ترجمة كلام دكاترتنا الباحث وليث الوغي بس بالصور علشان إخوانا في المنتدي يبقوا فاهمين الموضوع أيه قصته
أولا نشوف شكل فيرس الأنفلونزا
الفيرس عموما ياجماعة عبارة عن قطعة من الـ DNA أوRNA محاطة ببروتين
ففيرس الأنفلونزا كما نري شكل الكرة اللي جوه ده هو الشفرة الوراثية بتاعته والدبابيس اللي بره دي عبارة عن الوسائل التي يستخدمها الفيرس لمهاجمة الخلية وتتنوع مهامها .. والفيرس لما بيهاجم الخلية ويخترقها بتدخل شفرته الوراثية المحاطة بالبروتين فقط ويتحلل البروتين " الجاكت بتاعه " وبعد كده بعد إنقسام الشفرة بتاعته وإنتاج فيروسات أخري وهي خارجه تعمل بروتين يحيط بها - مهم الكلام ده علشان اللي جاي - والصورة دي توضيحية للعملية دي ..
يهمنا الحاجتين اللي بالألوان في الصورة الأولي وخاصة الـ Hemagglutinin .. ليه ؟
لأن ده عبارة عن الذراع التي يمسك بها الفيرس الخلية التي يهاجمها ثم تبدأ الإنزيمات وعلي رأسها الـ Neuroaminidase بالعمل علي إختراق الخلية ومن ثم يحدث التكاثر عن طريق نسخ الأر إن أيه وتحدث الإصابة .
الفيروسات بتاعة الإنفلونزا بتختلف في أمور من أهمها الذراع دي .. ليه ؟
لأن علشان الذراع اللي بنتكلم عنها دي تمسك في خليه لازم يتوفر لها نوع محدد من المستقبلات المسماه RECEPTORS وهي دي اللي بيمسك فيها ذراع الفيرس المهاجم
المستقبلات دي عبارة عن نوع من الأحماض يسمي sialic acid والحمض ده أو المستقبل ده أنواع ممكن يختلف الحمض اللي علي سطح خلايا كائن عن خلايا كائن آخر وبالتالي الذراع اللي هتمسك في الحمض في خلية الكائن الأول ممكن متعرفش تمسك في خلية الكائن الآخر وهكذا .. وناخد مثال :
الخلايا السطحية في الجهاز التنفسي للطيور فيها نوع من الحمض ده اسمه sialic acid alpha 2,3 وهي دي اللي بيمسك فيها فيرس أنفلونزا الطيور
بينما فيرس أنفلونزا البشر اللي إحنا عارفينه بيمسك في نوع آخر أسمه sialic acid alpha 2,6
كان الخوف أول مافيرس أنفلونزا الطيور ظهر إنه يتحول لنوع جديد ينتشر بين البشر .. هو دلوقتي بينتشر من الطيور للبشر لكن بين البشر لأ مش بيقدر بمعني أصح .. وهنا بقي يجي الكلام عن الخنازير !
معلش هاضرب مثال بسيط الأول بعد كده أوضح كلامي بالصوره
عارفين لما نجيب شوية رز وشوية عدس ونضعهم في إناء معين ونرج الإناء .. يعني نخلط الإثنين لما نيجي نأخذ شوية من الإناء هناخد رز ولا عدس ! .. هناخد الإثنين مع بعض بالتأكيد علشان إتخلطوا مع بعض .
هو ده بالظبط اللي بيحصل في عالم الفيروسات وتحولاتها .. الخنزير هو الإناء .. ليه ؟
لأن خلايا الخنزير فيها النوعين sialic acid alpha 2,6 و sialic acid alpha 2,3 .. يعني ممكن يستقبل فيرس طيور وممكن يستقبل فيرس بشري .. وهنا الكارثة !
فيرس الطيور ده مميت لكن لسه ذراعه مش بتقدر تتنقل بين خلايا البشر
وفيرس البشر العادي مش مميت لكن ذراعه تقدر تنتقل بين البشر
أكيد فهمتوا اللي عايز أقوله .. بصوا علي الصورة دي ..
هانفترض إن اللي تحت ده هو فيرس البشر وإن ذراعه البنفسجي دي .. وهانفترض إن اللي فوقيه ده فيرس الطيور ومفيهوش الذراع البنفسجي .. دخلوا الإثنين خلية خنزير .. عادي ممكن .. اتخلطت شفرتهم الوراثيه مع بعض .. فلما عملوا البروتين " الجاكت بتاعهم " وهما خارجين علموه خليط من الإثنين فخرج نوع جديد قاتل وينتقل بين البشر !!!!
والصورة دي برضو نفس الكلام
ده بس علشان الناس تفهم القصة دي ماشية إزاي ..
وربنا يستر .. الأمراض والأوبئة التي يعجز الطب عن دوائها كثرت وإنتشرت ولاحول ولاقوة إلا بالله
ربنا لاتؤاخذنا بما فعل السفهاء منا
والموضوع قابل للإضافات الإخبارية أو العلمية علي حد سواء إن شاء الله